मुलीच्या लग्नादिवशीच प्राध्यापक पित्याचे निधन

मुलीच्या लग्नादिवशीच प्राध्यापक पित्याचे निधन आजरा येथील घटना 

 

आजरा येथील आजरा महाविद्यालयाचे हिंदी विभागाचे प्राध्यापक हसनसाब अब्दुल माणगावकर यांचे मुलीच्या लग्नाच्या मुहूर्तावेळीच हृदयविकाराने निधन झाले. त्यांच्या निधनाबद्दल आजरा पंचक्रोशीत हळहळ व्यक्त होत आहे.

याबाबत अधिक माहिती अशी की,आजरा महाविद्यालयाचे हिंदी विभागाचे प्राध्यापक हसनसाब माणगावकर यांच्या मुलीचा आज सकाळी साडेअकरा वाजता लग्न समारंभ आयोजित केला होता. लग्नाची धावपळ सुरू असतानाच सकाळी त्यांना हृदयविकाराचा तीव्र झटका आला. आजरा येथे प्राथमिक उपचार करून पुढील उपचाराकरता गडहिंग्लज येथे हलवत असतानाच त्यांचे निधन झाले. ५६ वर्षीय माणगावकर यांच्या निधनाने आजरा शहरातील हैदर नगर परिसरासह सर्वधर्मीय बांधवांमध्ये शोककळा पसरली. त्यांच्या निधनाचे वृत्त शहर व परिसरात पसरताच नागरिकांनी त्यांच्या निवासस्थानी प्रचंड गर्दी केली होती. मुलीच्या लग्ना दिवशीच सदर प्रकार घडल्याने सर्वत्र हळहळ व्यक्त होत आहे. त्यांच्या पश्चात पत्नी, दोन मुली, दोन मुले, आई असा परिवार आहे.