बहिरेवाडीत चोरट्यांचा धमाकूळ…
पाच ठिकाणी घरफोड्या… पावणेदोन लाखांचा ऐवज लंपास
आजरा तालुक्यातील बहिरेवाडी येथे रविवारी चोरट्यानी धुमाकूळ घालत पाच ठिकाणी घरफोड्या करून संसारोपयोगी साहित्यासह सोन्या-चांदीचे दागिने असा एकूण सुमारे पावणेदोन लाखांचा मुद्देमाल लंपास केल्याने बहिरेवाडी पंचक्रोशीत खळबळ उडाली आहे. याप्रकरणी आजरा पोलिसात अज्ञाताविरोधात गुन्हा नोंद करण्यात आला आहे.
याबाबत आजरा पोलिसांनी दिलेली माहिती अशी की, बहिरेवाडी (ता. आजरा) येथील सौ. हौसाबाई गुंडू तावडे, गणपती आप्पा जोंधळे, अशोक भैरू आढावकर, साधना सुनील सावंत, काशव्वा रामचंद्र पोरे यांच्या राहत्या घरी अज्ञात चोरट्यांनी दरवाजाचे कडी कोयंडे तोडून प्रवेश करून घरातील रोख रक्कमांसह सोन्या चांदीचे दागिने व संसारोपयोगी साहित्य लंपास केले आहे.
सोन्या-चांदीच्या दागिन्यावर व रोख रकमेवर डल्ला मारण्याबरोबरच चोरट्यांनी चक्क सोयाबीन व जोंधळ्याची पोतीही लंपास केली आहेत.
याबाबतची फिर्याद सौ. हौसाबाई गुंडू तावडे यांनी पोलिसात दिली असून पोलीस पुढील तपास करीत आहेत.
एकाच वेळी पाच ठिकाणी घरफोड्या झाल्याने बहिरेवाडी पंचक्रोशीत खळबळ उडाली आहे.
